Pedro Burgo gaña a Carreira de Campións-Trofeo Caixanova do Racingshow de Vigo

O campión do mundo Didier Auriol (na foto) logrou a segunda praza e o terceiro posto foi para o portugués Ricardo Teodosio.

O piloto galego Pedro Burgo impúxose na tarde de onte sábado en Vigo ao campión do mundo de rallys, Didier Auriol, na final da Carreira de Campións-Trofeo Caixanova que se disputou no pavillón tres do Ifevi no marco do Racingshow Salón del Automóvil de Vigo.

O galego, cun Mitsubishi Evo 8, pasou pola liña de meta cun tempo de 1,04 minutos, mentres que o francés cumpriu o trazado en 1,05 minutos aos mandos dun Mitsubishi Evo 9. O terceiro posto do podio foi para o portugués Ricardo Teodósio (Mitsubishi Evo 8) que rexistrou un tempo de 1,06 minutos.

Miles de afeccionados presenciaron en directo a pericia de preto dunha trintena de pilotos que se disputaron o máximo galardón da carreira estrela desta terceira edición do Racingshow Caixanova Salón del Automóvil.

As motos protagonizan a xornada de hoxe domingo, xa que o circuíto indoor acolle a celebración do Supermotard Gran Premio Turismo de Vigo no que participarán unha vintena de pilotos entre os que estará o subcampión de Europa de Superbike e Campión Galego de Supermotard, David Vázquez. Polas características técnicas do circuíto e das propias motos, os pilotos terán que demostrar unha gran pericia para cumprir con éxito a totalidade do trazado.